Jean-Pierre Urwald (1836-1925) - Elise Kahn (1841-1918)

1880 kafe si d’Wunnhaus um Stued (rue des Bateliers) vu jiddeschem Véihändler. Den 1. Stack war Synagog an Unterrëchtsraum fir jiddesch Kanner. D’Elise Kahn stellt weiderhin hir Stuff fir d’jiddesch Gemeinschaft zur Verfügung. D’Woner-Wierkstat ass nieft dem Wunnhaus.

Mathias Urwald (1869-1952) - Marie Schumacher (1875-1934)

Am Krich mussen an der ‚viischter Wierkstat’ Rieder fir d’Wehrmacht (‚Räder rollen für den Sieg’) hiergestallt ginn. Déi hënnescht Fassad vum Wunnhaus gëtt beim Réckzuch vun de ‚Preisen’ duerch Granate komplett zerstéiert. D’Wunnhaus gëtt nom Krich beim Erëmopbau vergréissert. Wéini déi zweet Wierkstat, déi ‚hënnescht Wierkstat’, gebaut gëtt, konnt nach net genee erausfonnt ginn.

Jean-Pierre Urwald (1905-1994) - Lucie Konsbrück (1910-1995)

Nom Krich schaffe preisesch Gefaangener um Stued. Si ‚wunnen’ iwwert der neier Wäschkichen tëscht Wunnhaus an hënneschter Wierkstat. D’Zëmmer (haut d’Artisteloge) gëtt an der Famill ‚Dem Preiss sein Kummer’ genannt. Ee vun hinnen, den Helmut Tietken aus Lübeck, geet enges mueres, wärend d’Famill an der Houmass ass, mat der Bom hirem Pelzschal an enger Ham am Naachen iwwert d’Musel. (aus de Famillienerzielungen)

Mëtt den 1950er Jore gëtt de grousse Schapp bäigebaut. Nieft dem Wonerberuff gi Wéngerten, e klenge Bauerebetrib mat e puer Kéi a Schwäin a … Politik um Stued bedriwwen.

D’Maschinnen an der Wonerei lafe bis 1994. Duerno steet de Stued wärend 10 Joer eidel (1995-2005).

Georges Urwald (1971) - Nadine Kauffmann (1976)

D’Wunnhaus gëtt sanéiert (2005), den Holzschapp iwwert der hënneschter Wierkstat gëtt zum Museks- a Proufraum ëmgebaut (2009), déi viischt Wierkstat gëtt a Wunnberäicher ëmgewandelt (2013).

De Stued Theater mécht seng Dieren am Oktober 2008 an der hënneschter Wierkstat op.